ئەردۆغان لە ساردی پەیوەندییەکانی لەگەل ئیدارەی ئەمریکا نیگەرانە

SNN

ئاژانسی ئەسۆشیەیتد پرسێس ئاشکرایدەکات، هەوڵەکانی رەجەب تەیب ئەردۆغان سەرۆککۆماری تورکیا بۆ پتەوکردنی پەیوەندییەکانی لەگەڵ ئیدارەی نوێی ئەمریکا بێ ئەنجام بووە و تا ئێستا بایدن بێدەنگی لەوبارەیەوە هەڵبژاردووە.
دوای نزیکەی دوو مانگ لە دەستبەکاربوونی سەرۆکی نوێی ئەمریکا، تا ئێستا بایدن پەیوەندی بە ئەردۆغانەوە نەکردووە و ئەوەش بەلای بەرپرسانی تورکیاوە جێگەی نیگەرانییە.
بەرپرسێکی باڵای حکومەتی تورکیا کە بەهۆی هەستیاری بابەتەکەوە نەیویستووە ناوی ئاشکرابکرێت، بە ئاژانسەکەی وتووە: “ئەردۆغان دڵخۆش نییە بەو بێدەنگیەی بایدن لە بەرامبەریدا هەڵیبژاردووە”.
لەبارەی ساردی پەیوەندییەکانی نێوان ئەو دوو وڵاتە، مێرڤ تاهیرئۆغلو شرۆڤەکار لە ناوەندی توێژینەوەی (پرۆژەی دیموکراسیەت لە رۆژهەڵاتی ناوەڕاست) لە ئەمریکا، وتوویەتی: “یەکێک لە هۆکارەکانی ئاڵۆزی پەیوەندییەکانی نێوان ئەو دوو وڵاتە بەدەستهێنانی سیستەمی بەرگری مووشەکی رووسیایە، لە ئێستادا پاشگەزبوونەوەی تورکیا کارێکی گرانە چونکە رێککەوتنێکی گەورەی لەگەڵ روسیا کردووە، ئەو کارە بێ دەرئەنجامی خراپ تێناپەڕێت”.
یەکێکی دیکە لە خاڵە ناکۆکەکانی نێوان ئەو دوو وڵاتە پرسی پشتیوانیکردنی هێزەکانی یەپەگەیە لەلایەن ئەمریکاوە کە ئەنقەرە بە دوژمنی سەرسەختی خۆی تەماشایان دەکات.
پێشتریش خولوسی ئاکار وەزیری بەرگری تورکیا وتوویەتی، پەیوەندییەکانی تورکیا لەگەڵ ئەمریکا بەرەوپێش ناچێت تا ئەوکاتەی واشنتن پشتیوانییەکانی بۆ هێزە کوردییەکانی رۆژئاوا رادەگرێت.