کۆمەڵێک پزیشک لەکاتی ئەنجامدانی نەشتەرگەری سەما دەکەن
SNN
دوای بڵاوبوونەوەی گرته ڤیدیۆیه‌ك، ده‌سه‌ڵاتدارانی تونس بڕیاریاندا لێكۆڵینه‌وه له ره‌فتاری تیمێكی پزیشكی بكه‌ن، كه له‌كاتی نه‌شته‌رگه‌ری بۆ نه‌خۆشێك له یه‌كێك نه‌خۆشخانه‌كانی ئه‌و وڵاته سه‌ما ده‌كه‌ن.
یه‌كێك له په‌رستاره‌كان گرته‌یه‌كی ڤیدیۆی له تۆڕی كۆمه‌ڵایه‌تی “تیك تۆك” بڵاوكرده‌وه، له گرته ڤیدۆییه‌كه ده‌ركه‌وتووه، تیمێكی پزیشكی له‌به‌رده‌م نه‌خۆشێك به‌ده‌م مۆسیقاوه سه‌ما ده‌كه‌ن، له‌كاتێكدا نه‌خۆشه‌كه سكی به كراوه‌یی دیاره و له‌ژێر نه‌شته‌رگه‌رییه، گرته ڤیدیۆییه‌كه ده‌نگدانه‌وه‌یه‌كی زۆری له تۆڕی كۆمه‌ڵایه‌تی درووست كرد و ئاماژه به‌وه كراوه، كه “ته‌ندروستی خه‌ڵك بێبه‌ها كراوه”.
ده‌سه‌ڵاتدارانی تونس روونیانكرده‌وه، ئه‌و ره‌فتاره ده‌رچوونه له بنه‌ما پیشه‌ییه‌كان و رێزنه‌گرتنی نه‌خۆشه، له‌گه‌ڵ ئه‌وه‌ش مه‌ترسی له‌سه‌ر ژیانی نه‌خۆش درووست ده‌كات، بۆیه بڕیار دراوه لێكۆڵینه‌وه له ره‌فتاره‌كه بكرێت.
