پێنتاگۆن هۆشداری لە وەڵامدانەوەی هێرشە مووشەکیەکان دەدات
SNN
پێنتاگۆن هۆشداریدەداتە ئەو گروپانەی حەشدی شەعبی کە هێرشی مووشەکی دەکەنە سەر ئەو بنکە و ناوچانەی کە هێزی ئەمریکی لێیە و دەڵێت: “وەڵامیان دەدەینەوە”.
جۆن کیربی وتەبێژی وەزارەتی بەرگری ئەمریکا (پنتاگۆن)، لەوەڵامی پرسیارێکدا سەبارەت بە وەڵامی ئەمریکا بۆ ئەو هێرشانەی، کە بنکەکانیان لە عێراق دەکاتە ئامانج رایگەیاند: “لەکات و شوێنێکدا کە خۆمان دیاری دەکەین وەڵامی ئەو هێرشانە دەدەینەوە لە عێراق دەکرێتە سەرمان”.
کێربی وتی: “پاراستنی هێزەکانمان ئەولەویەتی ژمارە یەکە بەلای ئێمەوە، لەحاڵێکدا باوەڕمان بەوە کرد پێویستە وەڵامی هێرشەکان بەهەر شێوەیەک لە شێوەکان بدەینەوە، ئەو کارە لەکات و شوێنێکدا دەکەین کە خۆمان هەڵیدەبژێرین”.
وتیشی: ” کەس روودانی ئەو جۆرە هێرشانە ناخوازێت و بەشێوەیەکی زۆر ورد چاودێری دەکەین.”
هاوکات ئاماژەی بەوەکرد: پابەندین بە ئەرکەکانمانەوە لە عێراق کە لەسەر داوای حکومەتی عێراقی جێبەجێ دەکرێن بۆ یارمەتیدانیان لە روبەڕووبونەوەی داعش. ئەمریکا لەڕێگەی بەرزکردنەوەی توانای هێزە عێراقییەکانەوە، دەیەوێت سنورێک بۆ بەهێزبوونەوەی داعش دابنێت. چاودێری و لێکۆڵینەوەی چڕ لەو هێرشانە دەکەین کە بەرژەوەندییەکانی ئەمریکا لە عێراق دەکاتە ئامانج”.
