وێنە.. جموجۆڵی چەکدارانی داعش لەنێوان کفری و خورماتوو بڵاوکرایەوە
SNN
بەرپرسی مەڵبەندی حەمرین ی یەکێتی رايگەياند: “ژمارەی چەکدارەکانی داعش لەدەوروبەری قەزای خورماتوو گەیشتووەتە نزیکەی 70 چەکدار، سەرجەم ئەو چەکدارانە لە گوندە عەرەبیە رووخاوەکانن.”
مەلا کەریم شکور بەرپرسی مەڵبەندی حەمرین ی یەکێتی بە دەنگی ئەمريکای راگەياندووە: “هێزە عێراقیەکان ماوەی چەند ڕۆژێکە ئۆپەراسیۆنیان دەستپێکردووە، چونکە جم و جۆڵی داعشەکان زیادیکردووە و ئەو هێزانە دەیانەوێ ناوچەکە بپارێزن”.
سەبارەت بە پەیوەندی نێوان هێزە کوردیەکان و حەشدی شەعبی لەخورماتوو، کە پێشتر پەیوەندیەکانیان خراپبوو، مەلا کەریم دەڵێت “دوو جۆر حەشدی شەعبی لەخورماتوو هەیە، بەشێکیان ئەو هێزانەن لە خوارووی عێراقەوە هاتوون، ئێمە پەیوەندیمان لەگەڵیان باشە، بەڵام ئەو هێزانەی خەڵکی ناوچەکەن، ماوەی چوار مانگە بێدەنگن و کێشەیان دروست نەکردووە”.
زۆربەی ئەو چەکدارانەی لە سنوری خورماتوودان، لەبنەڕەتدا خەڵکی ناوچەکەن و بەشێکیان خەڵکی ناحیەی سلێمان بەگی سەربە قەزای خورماتون، بۆیە بەباشی شارەزای جوگرافیای ناوچەکەن.
دەنگی ئەمريکا بڵاويکردووەتەوە: “بەپێی ئەو وێنانەی دەستيان کەوتوون: “چەکدارەکان بە ئاشکرا لەگوندەکانی سنوری خورماتوو و ناوچەی غەڕەو پەڵکانە دەسوڕێنەوە، بە دوو دوو هاتووچۆ دەکەن، لەکاتێکدا فڕۆکەکانی هاوپەیمانان بەردەوام چاودێریان دەکەن و ناو بە ناو لێشیان دەدەن”.
بەپێی ئەو زانیاریانەی گەیشتووەتە دەزگا ئەمنیەکانی عێراق، داعش هێز و چەک و تەقەمەنی لەسوریاوە بۆ هاتووە، لەبەرامبەریشدا، پێشمەرگە و دەزگا ئەمنیەکان سەرقاڵی پێکهێنانی ژووری هەماهەنگین بۆ بەرەنگاربوونەوەی مەترسیەکانی ئەو رێکخراوە، بۆ ئەو مەبەستەش وەزیری بەرگری عێراق دوێنێ پێنجشەمە سەردانی کەرکوکی کرد”.
ئەو هێزانەی داعش کە لە دەوروبەری خورماتوون، پێشتر بە ناوچەکەدا دەسوڕانەوە و کەمترین هێرشیان ئەنجام دەدا، بەڵام ماوەیەکە دەستیان بەهێرش و پەلاماردان بۆ سەر هێزە کوردی و عێراقیەکان کردووە.
