رێکخراوێک: هاووڵاتییان قوربانی یەکەمی ئۆپراسیۆنەکەی تورکیان

SNN

رێکخراوی ئاشتەوایی مەسیحی، بەدواداچوونی بۆ کاریگەرییە مەترسیدارەکانی دوایین ئۆپراسیۆنی تورکیا لە هەرێمی کوردستان ئەنجامداوە و دەڵێت بەهۆی هێرش و بۆردومانەکانەوە 22 گوند لەسەر سنوور چۆڵکراون و چوار هاووڵاتیش برینداربوون.

ئەو رێکخراوە دەڵێت: ئەو 22 گوندە لە کۆی هەزار و 500 گوندی سنوورەکە چۆڵکراون و خانەوادەکەی دەڵێت هەرگیز ناتوانن بگەڕێتەوە بۆسەر ماڵ و ژیانی خۆیان، بەهۆی دروستکردنی بنکە و بارەگای سەربازی لە نزیک گوندەکانیان لەلایەن تورکیاوە.

رێکخراوی سی پی تی راشیگەیاندووە: نابێت هاووڵاتییانی مەدەنی ناوچە سنوورییەکانی هەرێم لە شەڕی نێوان تورکیا و پەکەکەدا بەئامانج بگیرێن.

رێکخراوەکە داوا لە تورکیا دەکات بەپەلە ئۆپراسیۆنە سەربازییەکەی رابگرێت لەپێناو پاراستنی گیانی هاووڵاتییانی مەدەنی و گەڕانەوەی گوندنیشنان بۆ سەر ماڵ و ژیانی ئاساییان.

رێکخراوەکە دەشڵێت هەزاران دۆنم زەوی کشتوکاڵی و نزیکەی هەزار و 300 پورەی هەنگ کە سەرچاوەی سەرەکی بژێوی ژیانی هاووڵاتیی بوون لەناوچوون.

باس لەوەشدەکات کە هاووڵاتییانی مەدەنی قوربانی یەکەمی بۆردومانەکانی تورکیان.