سبەی بە ئامادەبوونی ژمارەیەک وەزیر و بەرپرسی باڵای حکومەت پەرلەمان کۆدەبێتەوە

SNN-عەلی حەمە سەعید

وابڕیارە سبەی دوو شەممە بە ئامادە بوونی ژمارەیەك لە وەزیرو بەرپرسانی باڵای حكومەتی هەرێم كۆبوونەوەیەكی تایبەت بەپرسی ڕێككەوتنی نێوان هەولێر و بەغدا و بابەتی بەردەوامیدان بە لێبڕینی مووچەی فەرمانبەران بەڕێوە بچێت، سەرۆكی فراكسیۆنی یەكێتیش لە پەرلەمانی كوردستان ناوی ئەو وەزیر و بەرپرسانە ئاشكرا دەكات كە لە كۆبوونەوەكەی سبەی پەرلەمان ئامادە دەبن.

زیاد جەبار، سەرۆكی فراكسیۆنی یەكێتی لە پەرلەمانی كوردسان بە SNNی ڕاگەیاند: ماوەی دوو مانگە یاداشتێكمان لە پەرلەمانتارانی فراكسیۆنە جیاوازەكان ئاراستەی دەستەی سەرۆكایەتی پەرلەمان كردووە بۆ ئامادەبوونی حكومەت لە كۆبوونەوەی پەرلەمان و وەڵامدانەوەی پرسیاری پەرلەمانتاران لە بارەی پرسی بەردەوامیدان بە لێبڕینی مووچەی فەرمانبەرانی هەرێم و هەروەها هۆكاری جێبەجێنەكردنی ڕێككەوتنی نێوان بەغدا و هەولێر و نەگیشتنی پارە لە بەغداوە بۆ هەرێم.

ئاماژەی بەوەشكرد، وابڕیارە سبەی دوو شەممە ئەو كۆبوونەوەیە بەڕێوە بچێت بۆ ئەو مەبەستەش هەریەكە لە وەزیرانی ( دارایی و ئابوری، نەوت و سامانە سروشتییەكان ، پلاندانان، وەزیری هەرێم بۆ كاروباری بەغدا، سەرۆكی دیوانی ئەنجومەنی وەزیران و سكرتێری ئەنجومەنی وەزیران) ئامادەی ئەو كۆبوونەوەیەی پەرلەمان ببن، بۆیە بابەتی لێبڕینی مووچە بابەتی سەركی كۆبوونەوەكەی سبەی دەبێت و پەرلەمانتارانیش قسەی خۆیان دەكەن.

سەرۆكی فراكسیۆنی یەكێتی لە پەرلەمانی كوردستان ئەوەشی خستەڕوو، پێویستە وەزیر و بەرپرسانی حكومەت وەڵامێكی ڕاشكاوانەی پرسیاری پەرلەمانتاران بدەنەوە، هاوكات جگە لە بابەتی لێبڕینی مووچە هەر لە كۆبوونەوەكەی سبەینێدا خوێندنەوەی یەكەم بۆ چەند پرۆژە یاسایەك و خوێندنەوەی دووەم بۆ چەند پرۆژە یاسایەكی دیكە ئەنجام دەدرێت.