پاسەوانێک کە بەنیازبوو بانکێک لە هەرێم ببڕێت دەستگیرکرا

SNN

پاسەوانی بانکی جیهانی کەلار لەلایەن پۆلیسی گەرمیانەوە دەستگیرکرا، کە بە نیاز بوو ئەم جەژنە بانکەکە ببڕێت.

لە ڕاگەیەندراوێکدا پۆلیسی گەرمیان ئاشكرایکرد: “دوای وەرگرتنی زانیاری و چاودێریی ورد لەسەر تۆمەتبارێک، کە پاسەوانی بانکی جیهانە لە کەلار و ماوەی دوو مانگە پلانی دزینی بانکەکەی داڕشتووە و بەرنامەی  دانابوو لە ڕۆژانی پشووی جەژنی قوربان بانکەکە ببڕێت”.

لە ڕاگەیەندراوەکەدا ئاماژە بەوەشکراوە: “شەوی ڕابردوو بەشی پۆلیسی نەهێشتی تاوانی گەرمیان توانییان ئەو پلانە پووچەڵ بکەنەوە و دوو تۆمەتبار دەستگیربکەن، کە یەکێکیان پاسەوانی بانکەکەیە و ئەوەی تریان ئاگاداری پلانەکە بووە”.

پۆلیس ڕاشیگەیاندووە: “دوای لێکۆڵینەوە لەگەڵ تۆمەتباردا لە بەردەم دادوەری لێکۆلینەوەی کەلار دانی نا بەتاوانەکەیدا، لەئێستادا بەبڕیاری دادوەر و بەپێی مادەی 444 بەندکراوە و لێکۆلینەوە لەگەڵیدا بەردەوامە”.