چین بە یاسا بەکارهێنانی یارییە ئۆنلاینەکان بۆ سێ کاتژمێر لە هەفتەیەکدا سنووردار دەکات

SNN

حکومەتی چین لە رێگەی پەسەندکردنی یاسایەکەوە، بەکارهێنانی یارییە ئۆنلاینەکانی بۆ مێرمنداڵان سنوردار کردووە و لەمەودوا کەسانی خوار تەمەنی 18 ساڵ لە هەفتەیەکدا دەتوانن تەنها سێ کاتژمێر ئەو یاریانە بکەن.

بەپێی یاساکە شەوانی هەینی، شەممە و یەکشەممە لە کاتژمێر 8 بۆ نۆ مێرمنداڵان دەتوانن یاری ئۆنلاین بکەن، ئامانجیش حکومەتی چینیش لە یاساکە ئەوەیە رووبەڕووی ئالودەبوونی مێرمنداڵان بەو یارییانە ببێتەوە.

هاوکات یاساکە ماڵپەڕەکانی یارییە ئۆنلاینەکانیشی ناچار کردووە زانیاری تەمەنی بەکارهێنەرانەیان وەربگرن و بەدەر لەو کاتە دیاریکراوانە رێگە بە یاریکردنی مێرمنداڵان نەدەن.

دەسەڵاتدارانی چین باس لەوە دەکەن ئالودەبوون بە یارییە ئۆنلاینەکان کاریگەری نەرێنی لەسەر خوێندن و کەسایەتی و داهاتووی منداڵان دادەنێت.

بە پێی یاسایەک کە لە کۆتایی ساڵی 2019دا کەوتبوە بواری جێبەجێ کردنەوە، لە رۆژانی ناوەڕاستی هەفتەدا 90 خولەک و لە سێ رۆژی هەینی و شەممە و یەکشەممەشدا سێ کاتژمێر رێگە بە مێرمنداڵان درابوو یاری ئۆنلاین بکەن.

بە گوێرەی هەواڵێکی رۆیتەرز ئەو یاسا نوێیە زیانێکی زۆر لەو کۆمپانیا و ماڵپەڕانە دەدات، کە خزمەتگوزاری یاریییە ئۆنلاینەکان پێشکەش دەکەن.

وەک لە ئامارە فەرمییەکاندا هاتووە لە شەش مانگی یەکەمی ئەمساڵدا داهاتی کۆمپانیا و ماڵپەڕەکانی یارییە ئۆنلاینەکان لە چین 20 ملیار دۆلار بووە.