ئەردۆغان سەردانی عێراق دەکات
ئەردۆغان، وینە: EPA
SNN
باڵیۆزی تورکیا لە عێراق رایگەیاند: رەجەب تەییب ئەردۆغان سەرۆککۆماری تورکیا بەنیازە بەمنزیکانە سەردانی عێراق بکات.
عەلی رەزا گیونانی باڵیۆزی تورکیا لە عێراق ئەمڕۆ لە میانی کۆبوونەوەیەکی لەگەڵ قاسم ئەعرەجی راوێژکاری ئاسایشی نەتەوەیی عێراق وتیشی: “سەقامگیری عێراق بەواتای سەقامگیری ناوچەکە دێت”.
ئەعرەجی بە باڵیۆزەکەی تورکیای وتووە: “گرنگە کە تورکیا لە بارودۆخی تایبەتی عێراق تێبگات، بەتایبەت لە گرفتی ئاوی وڵاتەکە، هیواخوازیشین قۆناغێکی نوێ لە هەماهەنگی نێوان عێراق و تورکیا بێتە ئاراوە کە سوود بە بەرژەوەندی وڵات و خەڵکی هەردوو وڵاتەکە بگەیەنێت”.
باڵیۆزی تورکیا و راوێژکاری ئاسایشی نیشتمانی عێراق دوایین پەرەسەندنە ئەمنی و سیاسییەکانی ناوچەکەیان تاوتوێکرد.
ئەمە لەکاتێکدایە پێشتر ئەردۆغان بۆ کۆبوونەوەی لوتکەی بەغدا کە کۆتایی مانگی رابردوو بەڕێوەچوو، بانگهێشتکرابوو بەڵام ئامادەنەبوو لەجیاتیدا وەزیری دەرەوەی تورکیا ئامادەی لوتکەکە بوون.
