جەمیل بایک داوا لە خەڵکی هەرێمی کوردستان دەکات دەنگ بە یەکێتی بدەن
SNN
جەمیل بایک داوا لە خەڵکی هەرێمی کوردستان دەکات لە هەڵبژاردن دەنگ بە یەکێتی بدەن، هەروەها لەبارەی دۆخی نێوخۆی حیزبەکەشەوە دەڵێت “هەندێک کێشەی نێوخۆیی لە ناو یەکێتیی نیشتمانیی کوردستان دروستبوون، دووژمن دەیەوێت ئەو کێشانە گەورەتر بکات بۆ ئەوەی یەکێتی لاواز بکات و بە ئامانجەکانی بگات”.
جەمیل بایک، هاوسەرۆکی دەستەی بەڕێوەبەریی کۆماجڤاکێن کوردستان -کەجەکە- لەکاتی بەشداریکردن لە بەرنامەیەکی ستێرک تیڤیدا باسی دۆخی هەرێمی کوردستانی کرد و داوای لە خەڵک کرد دەنگ بە یەكێتی بدەن، هەروەها دەشڵێت “لەم بارودۆخەدا “دووژمن” دەیەوێت بە زیادکردنی هێرشەکانی، بە قووڵکردنەوەی ئاڵۆزی و گەورەکردنەوەی کێشەکانی ناو یەكێتی، خەڵک لە یەکدی دووربخاتەوە و بەمشێوەیە یەکێتی ئەنجامێکی باش لە هەڵبژاردن بەدەستنەهێنێت، بۆ ئەوەی لە ناوچەکانی یەکێتیدا هەندێک “پیلانی” خۆی جێبەجێ بکات”.
جەميل بايک دەشڵێت “هەرکاتێک پارت و رێکخستنە سیاسییەکانی کورد تووشی ناکۆکی بوون، “دووژمنان” هەوڵیانداوە ناکۆکییەکە گەورەتر بکەن، هەروەها هۆشداری بە خەڵک دەدات و دەڵێت، پێویستە ئاگاداری ئەو یارییە بن و رێگەی پێنەدەن”.
لە بەشێکی دیکەی قسەکانیدا جەمیل بایک تیشکی خستووەتەسەر هەڵبژاردنی عێراق کە بڕیارە لە 10-10-2021 بەڕێوەبچێت، یەکێتیی نیشتمانیی کوردستان لەگەڵ بزووتنەوەی گۆڕان بە یەک لیست بەشدارییان لەو هەڵبژاردنە کردووە، جەمیل بایک پێیوایە ئەوە هەڵبژاردنێکی ئاسایی نییە و دەڵێت دووژمنان بەتایبەت لە سەروبەندی هەڵبژاردنی ئەنجوومەنی نوێنەرانی عێراقدا کۆمەڵکوژییە سیاسییەکانیان زیادکردووە.
