بە قەزاكردنی ناحییەی عەنكاوە بانگەشەی هەڵبژردن بوو هیچ ڕێكارێكی یاسایی وەرنەگرتووە

SNN-عەلی حەمە سەعید

هەرچەندە بە گوێرەی یاسا دەبێت رێكارەكانی بە قەزاكردنی هەر ناحیەیەك لە ئەنجومەنی پارێزگاوە بخرێتە دەنگدان و پەسەندبكرێت، بەڵام لە چەند ڕۆژی ڕابردوودا بەرپرسانی پارتی وەك بانگەشەیەكی هەڵبژاردن بە قەزاكردنی ناحیەی عەنكاوەیان ڕاگەیاند و ئەندامێكی ئەنجومەنی پارێزگای هەولێریش ئاماژە بەوەدەكات هەر گۆڕانكارییەك لەیەكە ئیدارییەكان بكرێت دەبێت لە ئەنجومەنی پارێزگا پەسەندبكرێت.

دلێر حسێن، ئەندامی ئەنجومەنی پارێزگای هەولێر بەSNNی راگەیاند: لەماوەی چەند ڕۆژی ڕبردوودا لەلایەن بەرپرسانی حزبی سنوورەكەوە بابەتی بە قەزاكردنی عەنكاوەیان هێنابوویە بەرباس بەڵام لە ڕاستیدا ئەو بابەتە هیچ ڕێكارێكی یاسایی و كارگێڕی وەرنەگرتووە و تەنها بەڵێنێكی بانگەشەی هەڵبژاردن بوو بە دنیشتووانی ئەو سنوورە.

ئاماژەی بەوەشكرد، بە گوێرەی یاسا بەقەزاكردنی هەر ناحیەیەك دەبێت سەرەتا داواكارییەك ئاراستەی ئەنجومەنی پارێزگای هەولێر بكرێت پاش ئەوەی لە ئەنجومەن دەخرێتە بەرنامەی كارو پەسەند دەكرێت دواتر ڕەوانەی وەزارەتی ناوخۆ، دەكرێت و كۆتاجاریش لە ئەنجومەنی وەزیران بڕیاری كۆتایی لەبارەوە دەدرێت، بۆیە بە قەزكردنی عەنكاوە هیچ كام لەو ڕێكارانەی نەبڕیوە.

ئەو ئەندامەی ئەنجومەنی پارێزگای هەولێر ئەوەشی خستەڕوو، بەڵێنی بە قەزاكردنی عەنكاوە لەم كاتانەد كە هەڵبژاردنی پەرلەمانی عیراق لە ئارادایە جێگای گومانە، چونكە جگە لە عەنكاوە زۆر ناحییەی دیكەش هەن مەرجەكانی بە قەزاكردنیان تێدایە و چەندین جاریش دواكاریان ئاراستەی لایەنە پەیوەندیدارەكان كردووە بەڵام وەڵام نەدراونەتەوە.