بکوژی گەنجە 18 ساڵەکەی چەمچەماڵ دەستگيرکرا

SNN

بەڕێوەبەرایەتی ئاسایشی ڕۆژئاوای سلێمانی دەستگیرکردنی بکوژی گەنجە تەمەن 18 ساڵەکەی چەمچەماڵی ڕاگەیاند و بکوژەکە دەڵێت “پێشتر کێشەی لەگەڵ کوژراوەکەدا هەبووە بۆیە کوشتویەتی”.

ئەمڕۆ یەکشەممە 24ی تشرینی یەکەمی 2021، لە ڕاگەیەنراوێکدا بەڕێوەبەرایەتی ئاسایشی ڕۆژئاوای سلێمانی  ڕایگەیاند: “شەوی 20 لەسە ر 21ی تشرینی یەکەمی 2021  تۆمەتبارێک بەناوی (ب ، ج ، ع) کەسێک بەچەکی دەمانچە لەنزیک پێشەنگای ئۆتۆمبێل لە چەمچەماڵ بەناوی (هێمن عادل) دەکوژێت و هەڵدێت.”

ئاماژەی بەوەشکردووە: “پاش ئاگادارکردنی هێزەکانمان لەم ڕووداوە لەلایەن بنکەی پۆلیسی چەمچەماڵەوە پەڕاوی لێکۆڵینەوە بۆ ڕووداوەکە کرایەوە، تۆمەتباری هەڵهاتوو خۆی ڕادەستی (بنکەی ئاسایشی سەنگاو) ی سەربەبەڕێوەبەرایەتیمان کرد، ئەو چەکەشی تاوانەکەی پێ ئەنجام دراوە دەستی بەسەردا گیرا”.

بەگوێرەی ڕاگەیەنراوەکە، لەکاتی لێکۆڵینەوەدا تۆمەتبار دانی بەتاوەنەکەیدا ناوە و وتويەتی “پێشتر کێشەمان هەبووە لەگەڵ کوژراوەکەدا”.

ئەوەش هاتووە: “تۆمەتبارەکە دانیشتووی ناحیەی شۆڕشی سەربەقەزای چەمچەماڵە و لەبنەڕەتدا خەڵکی  گوندی (مشکیبان)ی ناحیەی قادرکەرەمە، کوژراوەکەش دانیشتووی ناحیەی شۆڕشی سەربەقەزای چەمچەماڵ بووەو لەبنەڕەتدا خەڵکی گوندی (قایتەوەن)ی ناحیەی قادرکەرەمە”.

ئاماژە بەوەشکراوە: “کەسێکی دیکەش دەستگیرکراوە کە  مۆبایلی کوژراوەکەی پێبووە.”