بەرهەمهێنانی كارەبا لە وێستگەی دەربەندیخان بۆ نزمترین ئاستی دابەزیوە
SNN-عەلی حەمە سەعید
لە ئەنجامی گرتنەوەی تەواوەتی سەرچاوەی ئاوی ڕوباری سیروان و دروستكردنی چەند بەنداوێك لەسەر ئەو ئاوە لەلایەن ئێرانەوە، ڕێژەی گلدانەوەی ئاو لە بەنداوی دەربەندیخان بۆ هەشت مەتر بە بەراورد بە ساڵی ڕابردوو كەمیكردووە، بەوتەی بەرپرسانی بەنداوەكەش بەهۆی كەمبوونەوەی ڕێژەی ئاو لە ئێستادا كەمترین بڕی كارەباش لە بەنداوەكە بەرهەمدەهێندرێت كە تەنها 20 مێگاواتە و ئەمەش كەمترین بڕی بەرهەمهیندراوی كارەبایە لە مێژووی دروستبوونی بەنداوی دەربەندیخان.
فارووق ئەحمەد، بەڕێوەبەری كارپێكردنی وێستگەی بەرهەمهێنانی كارەبا لە بەنداوی دەربەندیخان بە SNNی ڕاگەیاند: بەهۆی كەمبوونەوەی ئاستی ئاوی بەنداوی دەربەندیخان و گرتنەوەی سەرچاوەی ئاوی ڕووباری سیروان لەلایەن ئێرانەوە و دوستكردنی چەند بەنداوێك لەسەر ئەو سەرچاوە ئاوییە، بووەتە هۆی ئەوەی كە ڕێژەی گلدانەوەی ئاوی لە بەنداوی دەربەندیخان زۆر دابەزێت ئەمەش وایكردووە كە بڕی بەرهەمهێنانی كارەبا زۆر كەم بكات بەجۆرێك لە ئێستادا تەنها بڕی 20 مێگاوات كارەبا لە وێستگەی بەرهەمهێنانی كارەبا لە بەنداوی دەربەندیخان بەرهەم دەهێندرێت.
ئاماژەی بەوەشكرد، بە بەراوردبە ساڵی ڕابردوو لەم كاتەدا ڕێژەی بەرهەمهینانی كارەبا بۆ زیاد لە %50 كەمیكردووە چونكە ساڵی رابردوو لەم كاتەدا وێستگەكە توانای بەرهەمهێنانی 60 مێگاوات كارەبای هەبوو، بۆیە ئەوەی ئەمساڵ بەرهەمی دەهێنێت كەمترین بری كاربای بەرهەمهاتووە لە مێژووی دروستبوونی بەنداوی دەربەندیخان، لەكاتێكدا بەنداوی دەربەندیخان بە رێژی 70% پشت بە ئاوی سیروان و %30 پشت بە ئاوی باران و سەرچاوە ناوخۆییەكانی كوردستان دەبەستێت.
ئەو بەرپرسەی وێستگەی بەرهەمهێنانی كارەبا لە بەنداوی دەربەندیخان ئەوەشی خستەڕوو، ئەگەر بڕی پێویست ئاو لە بەنداوەگە هەبێت ئەوا دەتوانین دوو یەكەی بەرهەمهێنانی كارەبا پێكەوە كارپێبكەین و بڕی زیاد لە 80 مێگاوات كارەبا بەرهەم بهێنین، بەڵام ئەم ساڵ بەهۆی كەمی ئاستی ئاوی بەنداوەكەوە نەمانتوانیوە دوو یەكە بەیەكەوە كار پیبكەین چونكە لە ئێستادا ئاستی ئاوی بەنداوەكە زیاد لە هەشت مەتر كەمیكردووە.
