ئەمریکا: داوا لە بێلاڕوسیا دەکەین رێگە لە کۆچبەران بگرێت
SNN
ئەمریکا نیگەرانی نیشاندا لە دۆخی سنووری نێوان بێلاڕوسیا و پۆڵەندا کە هەزاران کۆچبەر ئەو سنوورەیان بڕیووە و ناکۆکی سیاسی نێوان بێلاڕوسیا و وڵاتانی ئەوروپای هێندەی دیکە قوڵکردووەتەوە.
نێد پرایس وتەبێژی وەزارەتی دەرەوەی ئەمریکا لە کۆنفرانسێکی رۆنامەوانیدا بێلاڕوسیای تۆمەتبارکرد بەوەی کۆچبەران وەک کارتی فشار بەکاردەهێنێت.
پرایس وتی: داوا لە بێلاڕوسیا دەکەین رێگە لە لێشاوی کۆچبەران بگرێت کە بەرەو ئەوروپا دەچن.
سەبارەت بە سزاکانی ئەمریکا بۆ سەر بێلاڕوسیا وتی: “تا ئەو کاتەی مینسک رێز لە بەرپرسیارێتییە نێودەوڵەتییەکانی سەرشانی نەگرێت، ئەمریکا بەردەوام دەبێت لە سزادانی حکومەتەکەی”.
لە ماوەکانی رابردوودا بە هەزاران کۆچبەر کە بەشێکی زۆریان کوردن رێگای بێلاڕوسیایان بەرەو پۆڵەندا و وڵاتانی دیکەی ئەوروپا بڕیووە و دوێنێش بەوهۆیەوە پۆڵەندا باری نائاسایی راگەیاند و هێزە ئەمنی و سەربازییەکانی خستە حاڵەتی ئامادەباشییەوە.
