لە مانگی رەمەزاندا دوو سەبەتەی خۆراک بەسەر هاووڵاتیان دابەشدەکرێت

SNN-عەلی حەمە سەعید

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئاماژەبەوەدەكات لە ئێستادا مادەكانی سەبەتەی خۆراكی گەیشتووەتە كۆگاكانی تایبەت بەهەڵگرتنی بەشەخۆراكی هاووڵاتیان و لەچەند ڕۆژی داهاتوودا یەكەم بەشە خۆراك دابەشدەگەین و تا كۆتایی مانگی ڕەمەزانیش بەشەخۆراكێكی دیكەش دابەشدەكەین كە ئەم دوو بەشە خۆراكە باشترین مادەی خۆراكی لەڕووی كوالییتەوە لە خۆدەگرێت و مادەیەكشی زیادەش دابەشدەكرێت كە مانگەكانی پێشتر دبەشنەكراوە.

نەوزاد شێخ کامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: دوای ئەوەی وەزارەتی بازرگانی عێراق ئەوەی ڕاگەیاند كە لەمانگی ڕەمەزاندا دووبەشەخۆراك بەسەر هاووڵاتیاندا دابەشدەكات، لە ئێستادا زیاد لە %95 بەشەخۆراكی یەكەممان بەدەستگەیشتووە و لەچەند رۆژی داهاتوو دەستدەكەین بەدابەشكردنی بەسەر بریكارەكاندا، هاوكات بەشێك لەمادەكانی بەشەخۆراكی دووەمیش گەیشتووەتە كۆگانمان و پێش كۆتایی مانگی ڕەمەزان ئەویش دابەشدەكەین.

ئاماژەی بەوەشكرد، ئەم دوو بەشەخۆراكەی كە لەم مانگی ڕمەزانە دابەشدەكرێت جگە لە ( ئارد و زەیت و شەكرو برنج و فاسۆلیاو زەیت و لەتكە نۆك و دۆشاوی تەماتە) كە مانگەكانی پێش دابەشكراوە، لەمانگی ڕەمەزاندا ( نیسك )یش بۆ بەشەخۆراكی هاووڵاتیان زیاد كراوە كە سەرجەمیان بە كوالیتییەكی بەرزەوە ئامادەكراون و همان ئەو كوالیتیە كە لە بازاڕەكاندا بەنرخێكی بەرز دەفرۆشرێن.

ئەو بەڕێوەبەرە گشتیەی وەزارەتی بازرگانی ئەوەشی خستەڕوو، بۆ هەر كەسێك بڕی نۆ كیلۆ ئارد و 400 گرام دۆشاوی تەماتە و سێ‌ كیلۆ برنج و كیلۆیك شەكر و لیترێك زەیت و نیوكیلۆ فاسۆلیا و نیوكیلۆ لەتكە نۆك، هاوكات نیوكیلۆ نیسكیش دابەشدەكرێت، ئەمەش كاریگەری زۆرباشی دەبێت لەسەر نزمبوونەوەی نرخی ئەومادە خۆراكییانە لەبازارەكاندا بەتایبەت لەمانگی ڕەمەزاندا كە هاووتیان خواستیان لەسەر كڕینی مادەخۆراكییەكان زیاتر دەبێت.