بە فەرمی لايەنێک لەسەر هێرشە موشەکييەکەی هەولێر هاتە دەنگ
SNN
شانەی ئەمنی عێراق رایگەیاند :شەوی رابردوو بە موشەک هێرش کراوەتە سەر هەولێر و موشەکەکانیش لە دەروازەی حەمدانییەوە هەڵدراون.
ئەمڕۆ پێنجشەممە، شانەی ئەمنی عێراق راگەیەنراوێکی بڵاوکردەوە و تیایدا هاتووە: گروپێکی چەکداری بە موشەک لە جۆری کاتیۆشا هێرشیان کردووەتە سەر هەولێر، موشەکەکانی لە ناوچەی چۆڵ و لە نزیک کۆمڵگەی نیشتەجێبوونی کەورگۆسک و پاڵاوتگەی کەورگۆسک و زێی گەورە کەوتوونەتە خوارەوە.
دەشڵێت “سەرجەم موشەکەکان لە دەروازەی سنووری حەمدانیە لە پارێزگای نەینەواوە ئاراستەی هەولێر کراون”.
راگەیەنراوەکەی شانەی ئەمنی عێراق ئەوەشی خستووەتەڕوو: هێزەکانمان دەستیان بە لێکۆڵینەوە و گەڕان و کێوماڵکردووە بە ئامانجی دۆزینەوەی ئەو کەسانەی هێرشە موشەکییەکانیان ئەنجامداوە.
