سلاڤۆی ژیژەک: پشتیوانی لە کورد گەرەنتی ئازادی لە هەموو ئێران دەکات

SNN

سلاڤۆی ژیژەک بیرمەند و فەیلەسوفی ناسراوی چەپ وێڕای دەربڕین پشتیوانی خۆی بۆ خۆپیشاندانەکانی ئێران و رۆژهەڵاتی کوردستان رایگەیاند: پشتیوانی لە کورد گەرەنتی ئازادی لە هەموو ئێران دەکات.

لە پەیامێکی ڤیدیۆییدا ژیژەک رایگەیاندووە: “خەباتی چەند رۆژی رابردووی خەڵکی ئێران و کوردستان هەڵگری کۆمەڵێک خەسڵەت و تایبەتمەندی گرنگ و سەرنجڕاکێشە. ئەو پێیوایە هاتنە سەر شەقام بە درووشمی “ ژن، ژیان، ئازادی” تیوەری ناسراوی رێژەیی بوونی فەرهەنگیی رەتکردووەتەوە.
ژیژەک ئەم جوڵانەوەیە بەناوەرۆکێکی فمنیستی پێناسە دەکات و پێیوایە ئەم شێوازە لە فمینیزم زۆر کامڵتر لە فمنیزمی رۆژئاواییە کە لەسەر رەتکردنەوە و سڕینەوەی پیاو وەستاوەتەوە.
ناوبراو لەبەشێکیتری پەیامە ڤیدیۆییەکەیدا باس لە کوردبوونی ژینا ئەمینی دەکات و پێیوایە کە کوردیش بەدەر لە پرسی ناسنامە کۆمەڵێک داواکاری و خواستی هاوبەشی لەگەڵ ناوچەکانیتری ئێران هەیە و هەروەها دەڵێتکە خەڵکی ئێرانیش بۆیان روون بۆتەوە کە بەبێ بوونی ئازادی بۆ کورد هیچکات ئێرانیەکانیش تامی ئازادی ناکەن.
لە پەیامەکەیدا باس لە پێشەنگایەتی کورد ئەکات و پێیوایە پشتیوانی لە کورد گەرەنتی ئازادی لە هەموو ئێران ئەکات. ناوبراو دەڵێت تەنانەت ئەگەر ئەم جوڵانەوەیە سەرکوتیش بکرێت دەتوانێت وەک ئەزموون و وەک ئاگری ژێر خۆڵەمێش درێژە بە زیندوبوونی خۆی بدات.
ژیژەک لە کۆتایی وتەکەیدا باس لە گرفتەکانی دیموکراسی لە رۆژئاوا دەکات و پێیوایە کە ئەم خۆپیشاندانانەی ئێران شتی زۆری تێدایە بۆ ئەوەی رۆژئاواییەکان لێی فێربن.