“عێراق مەترسی وشکەساڵی تێنەپەڕاندووە”
وشکەساڵی
SNN
عون زیاب عەبدوڵا وەزیری سەرچاوەکانی ئاوی عێراق ئەمڕۆ لە لێدوانێکدا ئاماژەی بەوەکرد، “سنورداربوونی ئاو و ھاتنی بۆ عێراق لە دەرەوەی کۆنترۆڵی ئەوان ھەیە، چونکە عێراق بە وڵاتێکی دەریاچەیی دادەنرێت و ئەوانیش زۆرینەیان لە تورکیاوە سەرچاوە دەگرن”.
ئاماژەی بەوەشکرد، ھەردوو رووباری دیجلە و فوڕات چیتر وەک رووبار نامێننەوە و لە ئێستادا گۆڕاون بۆ دوو کەناڵ کە رێژەیەکی زۆر کەم ئاویان تێدایە، ھۆکارەکەشی بۆ ئەوە دەگەڕێتەوە تورکیا دەروازەی ھەردوو روبارەکەی گرتووە و بەنداوی لەسەر دروستکردون.
وەزیری سەرچاوەکانی ئاو راشیگەیاند، عێراق تائێستاش لەبەردەم مەترسی وشکەساڵیدایە و ھاوینی ئەمساڵ رووبەری بەبیابان بوونی زیاتر دەبێتەوە، چونکە لەناوچەکانی باشور و ناوەڕاستی عێراق رێژەیەکی کەم بارانباریووە و لە ھەرێمی کوردستانیش تائێستا رێژەکە لەئاستی پێویستدا نییە.
ئەوەشی خستووەتەڕوو، بەنداوەکانی عێراق ھەموویان دەکەونە ھەرێمی کوردستان، لەو ناوچانەش باران بەگوێرەی پێویست نەباریووە و لەو کاتەشی پۆستی وەزارەتی سەرچاوەکانی ئاوی وەرگرتووە، کۆگاکانی ئاوی عێراق لە بەنداوەکاندا گۆڕانکاری بەسەردا نەھاتووە.
