سودانی: نەورۆز ئەوەمان بیردەخاتەوە کە هیچ جێگرەوەیەک نییە بۆ کارکردنی پێکەوەیی

SNN-

سەرۆکوەزیرانى عێراق پەیامێکى پیرۆزبایی بەبۆنەى هاتنى جەژنى نەورۆز بڵاوکردەوە و رایگەیاند، هیچ جێگرەوەیەک نییە بۆ کارکردنى پێکەوەیی و بەها هاوبەشەکان و یەک چارەنوسى و دەشڵێت: هەموو هەوڵەکان تەرخان دەکرێن بۆ پێشکەشکردنى خزمەت و پاراستنى مافەکان.

محەمەد شیاع سودانی دەشڵێت:” بە بۆنەی هاتنی جەژنی نەورۆزەوە، گەرمترین پیرۆزبایی ئاراستەی گەلی کوردی ئازیزمان لە هەرێمی کوردستانی عێراق و هەموو گەلی عێراقی بەڕێزمان دەکەم، بۆ ئەو هیوا و خۆشییەی کە ئەم ڕۆژە مەزنە هەڵیدەگرێت بۆ بەدیهێنانی ئایندەیەکی گەش:.

راشیگەیاند:”نەورۆز جارێکی دیکە هەموو پارچەکانی وڵاتەکەمان بەسەر دەکاتەوە، ڕۆڵەکانی ئێمەش بەردەوامن لە کارکردن و بونیاتنان و پتەوکردنی هەنگاوەکان بۆ بەدیهێنانی خواست و ئامانجە هاوبەشەکانی گەلی عێراق، ئەمەش لە ژێر ڕۆشنایی بەرنامەی حکومەتدا، کە گوزارشت لە پێداویستی و خواستەکانیان دەکات”.

سودانی لە پەیامەکەیدا ئاماژە بەوەشدەکات کە ئەم بۆنەیە جەخت لە هێزی فرەچەشنیی و بەردەوامیی ڕۆڵەکانی گەلەکەمان دەکاتەوە لەگەڵ تەرخانکردنی هەموو هەوڵەکان بۆ پێشکەشکردنی خزمەتگوزاری و پاراستنی مافەکان.

دەشڵێت: نەورۆزە ئەوەمان بیردەخاتەوە کە هیچ جێگرەوەیەک نییە بۆ کارکردنی پێکەوەیی و بەرزڕاگرتنی بەهاکانی هاوبەشیی و یەک چارەنووسیی و ئەو داهاتووەی کە ئێمە پێکەوە دەینەخشێنین لە سەرانسەری عێراق.