تورکیا سزای شەش ساڵ زیندان بە سەر پەنابەرێکی کورددا دەسەپێنێت
SNN
دادگای تورکیا لە شاری وانی باکووری کوردستان سزای شەش سال و 3 مانگ زیندانی بەسەر پەنابەرێکی کوردی خەڵکی رۆژهەڵاتی کوردستاندا سەپاند.
ئەو پەنابەرە کوردە ناوی مەهیار ئەحمەدی_یە و خەڵکی شاری سنەی رۆژهەڵاتی کوردستانە، پێشتر بە هۆی چالاکی مەدەنی و داکۆکی لە ژینگەوە لە ئێران دەستگیر و زیندانی کرابوو، لە خۆپیشاندانەکانی ساڵی 2022ی ئێرانیشدا جارێکی دیکە دەستگیرکرابووەوە و دواتر هەوڵی دابوو لە رێگەی تورکیاوە خۆی بگەیەنێتە ئەوروپا.
دادگای تورکیا تۆمەتی ئەندامبوون لە حزبێکی کوردستانی خستووەتە پاڵ ئەو پەنابەرە کوردە و بەوهۆیەوە ئەو سزایەی بەسەردا سەپاندووە.
ماری لالوەر، ڕاسپێردراوی تایبەتی ڕێکخراوی نەتەوە یەکگرتووەکان بۆ داکۆکیکاران لە مافەکانی مرۆڤلە راگەیەندراوێکدا وێڕای شەرمەزارکردنی سەپاندنی ئەو سزایە لەلایەن دەوڵەتی تورکیاوە، داوای ئازادکردنی دەسبەجێی ئەم پەنابەرە کوردەی کردووە.
