وتەبێژی كۆمیسیۆنی هەڵبژاردنەكانی عێراق بۆ SNN “تا ئەمڕۆ هیچ بڕیارێك نییە بۆ دواخستنی هەڵبژاردن”

SNN-عەلی حەمە سەعید

وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات ئێمە بەردەوامین لە كارەكانمان بۆ ئامادەكاری بەڕێوەچوونی پرۆسەی هەڵبژاردنی پەرلەمانی كوردستان لە 10/6 هاوكات جەختیش دەكاتەوە كە تا ئەمڕۆ هیچ داواكارییەكمان بەدەستنەگەیشتووە بۆ دواخستنی هەڵبژاردن و تائێستاش نزیكەی70 ملیار دینارمان بۆ ئامادەكارییەكان خەرجكردووە.

جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بەSNNی ڕاگەیاند: لە لایەن (محەمە شیاع سودانی) سەرۆكوەزیرانی عێراقەوە وەزارەتی دارایی عێراقی ڕاسپاردووە بە تەرخانكردنی بڕی بودجەی پێویست بۆ بەرێوەبردنی هەڵبژاردنی پەرلەمانی كوردستان، لەو چوارچێوەیەشدا كومیسیۆنی باڵای سەربەخۆی هەڵبژاردنەكان داوای لە وەزارەتی دارایی كردووە كە بڕی پارەی پێویست بۆ دەستكردن بە ئامادەكارییەكان تەرخان بكەن و تائێستا وەزارەتی دارایی بڕی نزیكەی 70 ملیار دیناری ڕادەستكردوین بۆ بەڕێوەبردنی پرۆسەكە.

ئاماژەی بەوەشكرد، تائێستا بەفەرمی بابەتی دواخستنی هەڵبژاردن و ڕاگرتنی كاروبارەكانمان لە كۆمیسیۆن باس نەكراوە و لەوبارەیەشەوە هیچ نوسراوێكی فەرمیمان بەدەستنەگەیشتووە بۆیە بەگوێرەی ئەو مەرسومە هەرێمییەی كە لەلایەن سەرۆكی هەرێمی كوردستانەوە دەرچووە ئێمە بەردەوامین لە كارەكانمان بۆ ئەنجامدانی هەڵبژاردن لە 10/6/2024

وتەبێژەكەی كۆمیسیۆنی باڵای سەربەخۆی هەڵبژاردنەكانی عێراق ئەوەشی خستەڕوو، بەگوێرەی ئەو پلانەی دامانناوە لە10ی مانگی داهاتوو دەستدەكرێت بە بانگەشەی هەڵبژاردن، و بۆماوەی نزیكەی مانگێك بانگەشە بەردەوام دەبێت، بۆیە بەگوێرەی یاسا ئێمە بەردەوامن لە ئامادەكارییەكان بۆ ئەوەی لە وادەی خۆیدا هەڵبژاردن ئەنجام بدرێت.