دادگای فیدراڵی عێراق لەسەر دوو سكاڵا سەبارەت بە هەرێم كۆدەبێتەوە
دادگای فیدڕاڵی عێراق
SNN
رۆژی یەكشەممە، دادگای فیدراڵی عێراق لەسەر سكاڵاكەی مەسرور بارزانی سەرۆكی حكومەتی هەرێم كۆدەبێتەوە، كە داوایكردووە ماددەی دوو لە سیستمی تۆماركردنی لیستی كاندیدەكان و پەسەندكردنیان بۆ هەڵبژاردنی پەرلەمانی كوردستان بە نادەستووری دابنرێت.
رۆژی 21ی مانگیش، دادگای فیدراڵی لەسەر سكاڵای چەند فەرمانبەرێك كۆدەبێتەوە، كە لەسەر سەرۆكی ئەنجومەنی وەزیرانی عێراق و وەزیری دارایی عێراق و سەرۆكی ئەنجومەنی وەزیرانی هەرێم و وەزیری دارایی هەرێم تۆماریان كردووە و داوا دەكەن پرسی پێدانی مووچەی هەر سێ مانگی تشرینی یەكەم و تشرینی دووەم و كانونی یەكەم یەكلابكرێتەوە.
هەر لەو رۆژەدا، سكاڵایەك تاوتوێ دەكرێت سەبارەت بە كەركوك، كە داواكراوە فەرمانێكی وەلائی دەربكرێت بۆ كشانەوەی دەسەڵاتی دارایی و ئیداری پارێزگاری ئێستای كەركوك، هەروەها بۆشایی چاودێری و خزمەتگوزاری بەهۆی نەبوونی ئەنجومەنی پارێزگاوە پڕ بكرێتەوە.
