“حكومەتی عێراقی هەوڵی وشككردنی سەرچاوەكانی داهاتی گومرگی هەرێم دەدات”
ساماڵ عەبدولڕەحمان، بەرێوەبەری گشتی گومرگی هەرێم
SNN-عەلی حەمە سەعید
بەڕێوەبەری گشتی گومرگی هەرێم ئاماژە بەوەدەكات، بڕیاری دانانی خاڵی گومرگی لە لایەن حكومەتی عێراق لە سنوری نێوان هەرێم و عێراق لەسەر بنەمای لیژنەیەكی تایبەت دراوە، كە لەسەر ڕاسپاردەی سەرۆكوەزیرانی حكومەتی عێراقی بووە، جەختیش دەكاتەوە كە ئەو هەنگاوەی عێراق بۆ وشككردنی سەرچاوەكانی داهاتی گومرگی هەرێمی كوردستانە.
ساماڵ عەبدولڕەحمان، بەڕێوەبەری گشتی گومرگی هەرێم بە SNNی ڕاگەیاند: لەگەڵ ئەوەی ئێمە چەندین جار لەگەڵ بەرپرسانی گومرگی حكومەتی عێراقی كۆبووینەتەوە و بۆمان ڕوونكردنەتەوە كە دەروازە سنورییەكانی هەرێم بەشێوەیەكی شەفاف كاردەكەن لە بواری گومرگی، بەڵام دانانی خاڵی سنوری حكومەتی فیدراڵی عێراق لە هەرێمی كوردستان لەسەر بنەمای لیژنەیەكی تایبەت دراوە، كە پێكهاتوە لە جێگری دەزگای ئاسایشی نیشتمانی، بریكاری وەزارەتی ناوخۆ بۆ بازگەكان، بەڕێوەبەری گشتی گومرگ، بەڕێوەبەری بازگاكان لە شارەكانی موسڵ و دیالە و كەركوك و بەغدا.
ئاماژەی بەوەشكرد، ئەو هەوڵەی حكومەتی عێراقی بە دانانی خاڵی گومرگی لەنێوان هەرێمی كوردستان و پارێزگاكانی دیكەی عێراق مەبەست لێی بەئامانج گرتنی حكومەتی هەرێم و وشككردنی داهاتی گومرگییە لەهەرێمی كوردستان ئەمەش زیاتر مۆركێكی سیاسی تێدا دەردەكەوێت وەك ئەوەی پرسێكی دارایی بێت.
بەڕێوەبەری گشتی گومرگی هەرێم ئەوەشی خستەڕوو، هەر رێگرییەك دروست ببێ لە بازگەكان بۆ هەناردە و هاوردەكردنی كاڵا لە عێراقەوە بۆ هەرێمی كوردستان و بە پێچەوانەشەوە ئەوا بەدڵنیایی كاریگەریی دەبێت لەسەر بەرزبوونەوەی نرخی كاڵاو شمەك لەسەر هاووڵاتیان، بۆیە سیاسەتی ئابوری بەمجۆرە سەركەوتو نابێت، بۆیە حكومەتی هەرێم بڕیاری پێكهێنانی لیژنەیەكی باڵای داوە بۆ گفتوگۆكردن لەسەر ئەم پێشهاتە نوێییە، چونكە لە دانانی ئەو خاڵانەی پشكنین نە بە ئێمە وتراوە نەئاگاداریش كراوینەتەوە.
