ژمارەی زیارەتکارانی چلەی ئیمام حوسێن کە لە رێگەی خاکی ئێرانەوە هاتوونەتە عێراق ئاشکرابوو

SNN

وەزیری ناوخۆی ئێران ژمارەی زیارەتکارانی ئاشکراکرد کە لە رێگەی خاکی وڵاتەکەیەوە چوونەتە ناو عێراقەوە و وتی “نزیکەی 3.5 ملیۆن زیارەتکار چوونەتە خاکی عێراقەوە”.

ئەمڕۆ هەینی وەزیری ناوخۆی ئێران رایگەیاند، ئەو زیارەتکارانەی لە رێگەی خاکی وڵاتەکەیانەدوە چوونەتە ناو عێراقەوە ژمارەی 3.5 ملیۆن زیارەتکار دەبێت، هاوکات نزیکەی 2 ملیۆنیش لە چوارچێوەی پرۆسەی گواستنەوەی پێچەوانەوە گەڕاونەتەوە بۆ وڵات.

بەهۆی چلەی ئیمام حوسێنەوە لە زۆرینەی شارەکانی عێراق چەند رۆژێک کراوەتە پشوو، لە ئێستاشدا رێورەسمی چلەی ماتەمینییەکە بەرەو کۆتایی دەچێت و بەشێک لە زیارەتکاران دەگەڕێنەوە وڵاتی خۆیان.

لەلایەکی ترەوە، دەستەی دەروازوە سنورییەکانی عێراق هەر ئەمڕۆ ئەوەی خستە روو، ژمارەی زیارەتکاران لە سێ ملیۆن و 200 هەزار کەس زیاتر تێپەڕیوە، ملیۆنێک و 878 هەزار و 533 زیارەتکار گەڕاونەتەوە وڵاتەکەیان.