ئەکرەم ئیمام ئۆغڵو سزای سێ ساڵ زیندانیکردنی بەسەردا سەپێنرا

SNN

ئەكرەم ئیمام ئۆغڵو سەرۆكی گەورە شارەوانی ئیستانبوڵ، سزای نزیكەی سێ‌ ساڵ زیندانی ‌و قەدەغەی كاری سیاسی بەسەردا سەپێندرا و تانەی پارێزەرەكانیشی رەتكرانەوە.

ئەمڕۆ شەممە 20ی ئەیلوول، فەرمانگەی دادگای تێهەڵچوونەوەی ئیستانبوڵ بە تاوانی سوكایەتیكردن بە سەرۆك و ئەندامانی ئەنجومەنی باڵای هەڵبژاردنەكان و فەرمانبەرانی دەوڵەت، سزای دوو ساڵ و حەوت مانگ و 15 رۆژ زیندانی و قەدەغەی كاری سیاسی بەسەر ئەكرەم ئیمامئۆغڵو سەرۆكی پێشووی گەورە شارەوانی ئیستانبوڵدا سەپاند.

هاوکات، دادگاكە تانەی پارێزەرانی ئیمام ئۆغڵوی رەتكردەوە ‌و دۆسیەكەی رەوانەی ئەنجومەنی باڵای دادوەریی توركیا كرد بۆ ئەوەی بڕیاری كۆتایی لەسەر بدات.

ئیمامئۆغڵو سەرۆكی گەورە شارەوانی ئیستانبوڵ، كاندیدی پارتی گەلی كۆماری جەهەپە بوو بۆ هەڵبژاردنی سەرۆكایەتی توركیا، بەڵام بە تۆمەتی گەندەڵی و بڕوانامەی ساختە، لە 19ـی ئاداری ئەمساڵ لەسەر بڕیاری داواكاری گشتیی ئیستانبوڵ دەستگیركرا.