تاران ئەمریکا بە تێکدانی ئاسایشی گەرووی هورمز تۆمەتبار دەکات

SNN-

وەزارەتی دەرەوەی ئێران ڕایگەیاند کە عەباس عراقچی، وەزیری دەرەوەی وڵاتەکە، لە پەیوەندییەکی تەلەفۆنیدا لەگەڵ هاوتا چینییەکەی گفتوگۆی کردووە دەربارەی لێکەوتەکانی پێشێلکردنی بەندەکانی لێکتێگەیشتنی کۆتاییهێنان بە جەنگ لە لایەن واشنتنەوە، و ئەمریکای بە بەرپرسیار زانی لە نەبوونی ئاسایش لە گەرووی هورمزدا.

عراقچی لەو کۆبوونەوەیەدا جەختی کردەوە کە تێکچوونی دۆخی ئەمنی لە گەرووی هورمزدا دەرئەنجامی ڕاستەوخۆی پابەندنهەبوونی ئەمریکایە بە بەڵێنەکانیەوە، هاوکات سەرکۆنەی ئەو هێرشانەی ئەمریکای کرد کە ژێرخانی ئابووری و خزمەتگوزارییەکانی ئێرانیان کردووەتە ئامانج.

لە لایەکی ترەوە، لە پەیوەندییەکی تەلەفۆنیی جیادا لەگەڵ وەزیری دەرەوەی ڕووسیا، وەزیری دەرەوەی ئێران جەختی لەسەر سووربوونی تاران کردەوە بۆ ڕێگریکردن لەوەی ئەمریکا گەرووی هورمز بۆ مەبەست و بەرژەوەندییەکانی خۆی بەکاربهێنێت.