دەستەی کەشناسی عێراق: شەپۆلێکی بارانبارین و هەورەبروسکە هەرێمی کوردستان و عێراق دەگرێتەوە

SNN-

لە درێژەی گۆڕانکارییە كەشوهەواییەکاندا، دەستەی گشتیی کەشناسی و بوومەلەرزەزانی عێراق ڕاگەیەندراوێکی لەبارەی دۆخی ئاسمانی و پێشبینییەکانی چەند ڕۆژی داهاتووی وڵات خستەڕوو، تێیدا ئاماژە بەوە کراوە کە سیماکانی وەرزی پاییز و فێنکایی ڕوو لە ناوچەکان دەکەن.

بەپێی زانیارییەکانی کەشناسی، ئەمڕۆ پێنجشەممە 1ی تشرینی یەکەمی 2026، ئاسمانی زۆربەی ناوچەکان نیمچەهەور دەبێت و لەگەڵ دابارینی نمەباران، هەندێک کات لە ناوچەکانی ناوەڕاست و باکوور (هەرێمی کوردستان) هەورەبرووسکەش دەبێت. هاوکات پلەکانی گەرما لە ڕۆژدا لە ئاستێکی مامناوەند و گەرمدا دەبن، بەڵام بەرەبەیان و شەوانە هەست  بە فێنکی و سەرمایەکی سووک دەکرێت، لەگەڵ خێرایی بایەکی مامناوەند لە نێوان 10 بۆ 20 کیلۆمەتر لە کاتژمێرێکدا و دابەزینی مەودای بینین بۆ 5 تا 7 کیلۆمەتر لە کاتی باراندا.

سەبارەت بە کەشوهەوای سبەی هەینی پێشبینی دەکرێت  دۆخی ئاسمانی نیمچەهەور بمێنێتەوە و لە هەندێک ناوچەی هەرێم بارانی مامناوەند ببارێت، لەگەڵ دابەزینی گشتیی پلەکانی گەرما لە سەرتاسەری وڵاتدا.

هەروەها لە ڕۆژانی شەممە و یەکشەممەدا، ئاسمانی ناوچەکانی ناوەڕاست و باشوور لە نێوان نیمچەهەور بۆ هەوری تەواو دەگۆڕێت و نمەبارانی پچڕپچڕ تۆمار دەکرێت، پێش ئەوەی لە ڕۆژی دووشەممەدا پلەکانی گەرما کەمێک بەرز ببنەوە لەگەڵ بەردەوامبوونی ئەگەری بارانبارین لە چەند ناوچەیەکی جیاوازدا.