کوێستان محەمەد
SNN-
وەزارەتی کار و کاروباری کۆمەڵایەتیی هەرێمی کوردستان، لە هەنگاوێکی فەرمیدا، داوایەکی بەپەلەی ئاراستەی سەرۆکوەزیرانی عێراق کرد بۆ دابینکردنی بودجەی پێویست لە بودجەی فیدراڵی ساڵی 2027دا، بە مەبەستی فریاکەوتنی توێژە هەژارەکان و خاوەن پێداویستییە تایبەتەکان.
کوێستان محەمەد وەزیری کار و کاروباری کۆمەڵایەتیی نامەیەکی بۆ عەلی زەیدی سەرۆکوەزیرانی عێراق ناردووە وو دەڵێت: لە ساڵی 2015ەوە مووچەی سوودمەندانی تۆڕی پاراستنی کۆمەڵایەتی ڕاگیراوە، هەروەها پڕۆسەی تۆمارکردنی نوێ بۆ کەمئەندامان لە ساڵی 2013ەوە پەککەوتووە، لە کاتێکدا ئێستا زیاتر لە 100 هەزار خێزانی هەژار و 30 هەزار کەمئەندام چاوەڕێی دەستپێکردنەوە و دابینکردنی مافەکانیانن، لە کاتێکدا بڕی مووچەی ئێستای کەمئەندامان لە هەرێم تەنها 150 هەزار دینارە.
لەم چوارچێوەیەدا، وەزارەتەکە سێ داواکاریی سەرەکیی خستووەتەڕوو:
تەرخانکردنی بڕی 467 ملیار دینار وەک بودجەی ساڵانە بۆ تۆڕی پاراستنی کۆمەڵایەتی و کەمئەندامان.
یەکسانکردن و بەرزکردنەوەی مووچەی کەمئەندامانی هەرێم بۆ 250 هەزار دینار، بە هاوشێوەی پارێزگاکانی تری عێراق.
دەستپێکردنەوەی تۆمارکردنی ناوی نوێ بۆ کەمئەندامان و 100 هەزار خێزانی هەژار، پشتئەستوور بە ماددەکانی 14، 30 و 32ی دەستووری عێراق.
