وەزیری دەرەوەی فەرەنسا: رێز لە ئیسلام دەگرین

SNN

فەرەنسا هێشتا لە هەوڵی هێورکردنەوەی ئەو گرژییانەیدایە کە سەبارەت بە ئایینی ئیسلام لەگەڵ بەشێک لە وڵاتانی زۆرینە موسوڵمان دروستیکردووە، وەزیری دەرەوەی ئەو وڵاتە جارێکی دیکە پشتیوانی خۆی بۆ ئەو ئاینە دەربڕی.

ژان ئیڤ لۆدریان لە میانی سەردانێکیدا بۆ قاهیرەی پایتەختی میسر، لە کۆنفرانسێکی رۆژنامەوانیدا رایگەیاند: “ئێمە رێزێکی زۆر لە ئایینی ئیسلام دەگرین”، دووپاتیشیکردەوە: “موسوڵمانان بەشێکی دانەبڕاون لە کۆمەڵگای فەرەنسی”.

لۆدریان لە درێژەی قسەکانیدا وتی: “دەمەوێت ئەو پەیامە بگەیەنم کە ئێمە رووبەڕووی هەڕەشەی تیرۆر و توندڕەوی بووینەتەوە لە خاکی وڵاتەکەماندا و لە زۆر شوێنی دیکەی جیهانیش، ئەم شەڕە شەڕی هەموومانە”.

لۆدریان لە دوای کۆبوونەوەی لەگەل شێخ ئەحمەد تەییب سەرۆکی کۆمەڵەی ئەزهەر، باسی لەوەکرد: “بە ئیمامی ئەزهەرم وتووە کە چەندێک پێویستمان بە هاوسەنگی و دانبەخۆداگرتن هەیە”.

لەدوای بڵاوبوونەوەی کاریکاتۆرێک لەسەر پێغەمبەری ئیسلام، بەشێک لە کۆمەڵگای ئیسلامی رەخنەی توندیان لە حکومەتی فەرەنسا گرت.