پەنابەرێکی خەڵکی سلێمانی لە ئیتاڵیا بەهۆی شەمەندەفەرەوە گیانیلەدەستدا

SNN

سەرلەبەیانی ئەمڕۆ،  لە وڵاتی ئیتاڵیا تەرمی کەسێکی خەڵکی سلێمانی لەسەر هێڵێکی ئاسنین دۆزرایەوە، کە وا دەردەکەوێت شەمەندەفەرەکە کردبێتی بە ژێرەوە.

پۆلیسی ئیتاڵیا رایانگەیاندووە، ئەو کەسە کوردە و خەڵکی سلێمانییە، تەمەنی 44 ساڵە بەناوی (ب.ن)، لەساڵی 1999ەوە لە ئەوروپا نیشتەجێیە.

ئاری جەلال سەرپەرشتیاری دەزگای لوتکە لەوبارەیەوە رایگەیاندووە: “بەدواداچوونمان بۆ کەیسەکە کردووە، پۆلیسی ئەو وڵاتە گوماندەکات کەیسەکە خۆکوژی بێت و بەمەبەست خۆیهەڵدابێتە سەر هێڵی شەمەندەفەرەکە”.

دەشڵێت: “پۆلیس بەردەوامە لە لێکۆڵینەوەکانی، لەهەمان کاتدا شۆفێری شەمەندەفەرەکە دەڵێت هیچ شتێکی نەبینیووە”.

کەسوکاری ئەو کەسەی کە تەرمەکەی دۆزراوەتەوە لە رووداوەکە ئاگادارکراونەتەوە.

تا ئێستا بە چەند شەپۆلێک ژمارەیەکی زۆر لە هاووڵاتییانی هەرێم کۆچیان بەرەو وڵاتانی ئەوروپا کردووە، بەهۆی خراپی رەوشیانەوە بەشێکیان لەسەر خواستی خۆیان گەڕاونەتەوە بۆ هەرێم.