رووسيا ئۆکرانيا تۆمەتبار دەکات

SNN

وەزارەتی بەرگریی رووسیا رایگەیاند: هێزەکانی ئۆکرانيا زیاتر حەوت هەزار و 500 بیانییان وەک بارمتە دەستبەسەر کردووە.

میخائیل میزینچیڤ سەرۆکی ناوەندی فەرماندەیی بەرگریی نیشتمانیی رووسیا، لە راگەیەندراوێکدا بڵاویکردووەتەوە: هەزاران هاووڵاتیی بیانی بە زەبری هێز لە شارە جیا جیاکانی ئۆکرانيا دەستبەسەرکراون.

وتیشی “لە شاری خارکیڤ سێ هەزار و 189 هاووڵاتیی هیندی، دوو هەزار و 700 ڤێتنامی، 200 ئوردنی و 30 میسری هەن”.

هەر بە گوێرەی راگەیەندراوەکە: لە شاری سۆمی 576 هاووڵاتیی هیندی، 121 چینی، 100 هاووڵاتیی وڵاتانی غانا 60 میسری و 45 ئوردنی هەن.

میخائیل میزینچیڤ جەختی لەوەشکردووەتەوە: نازییە نوێیەکان رێگەی دەرچوونیان لە هەزاران ئۆکرانی و چەندین هاووڵاتیی بیانی گرتووە بۆ دەربازبوونیان بۆ شوێنە ئارامەکان.

راشیگەیاند: گرووپە تیرۆریستییەکان بەردەوامن لە بەکارهێنانی هاووڵاتییانی سڤیل و بیانییەکان وەک قەڵغانی مرۆیی.

رۆژی 24ی شوباتی مانگی رابردوو، رووسیا ئۆپەراسیۆنی سەربازیی بۆسەر ئۆکراینا دەست پێکرد، ئەمەش کاردانەی نێودەوڵەتیی بەدوای خۆیدا هێنا و ژمارەیەک لە وڵاتان سزای ئابووری و دارایی قورسیان بەسەر مۆسکۆدا سەپاند.