خولی دووەمی هەڵبژاردنەکانی سەرۆکایەتیی کۆماری تورکیا بەڕێوەدەچێت

SNN-

ئەمڕۆ یەکشەممە، پرۆسەی دەنگدان لە خولی دووەمی هەڵبژاردنەکانی سەرۆکایەتیی کۆماری تورکیا دەستی پێ کرد کە تیایدا زیاتر لە 60 ملیۆن دەنگدەر مافی دەنگدانیان ھەیە.

کاتژمێر 8:00 ئەمڕۆ، بنکەکانی دەنگدان، بەڕووی دەنگدەراندا کرانەوە پرۆسەکەیش تا کاتژمێر 17:00 بەردەوامی دەبێت.

لە ھەڵبژاردنەکانی ئەمڕۆدا، زیاتر لە 60 ملیۆن دەنگدەر کە تەمەنیان لە سەروو 18 ساڵەوەیە مافی دەنگدانیان ھەیە و زیاتر لە 191 ھەزار سندوق بەسەر ھەزار و 94بنکەی دەنگدان دابەشکراون.

ھەریەک لە کاندیدی ھاوپەیمانیی “جمھور” بۆ سەرۆکایەتی کۆمار، رەجەب تەیب ئەردۆغان و کاندیدی ھاوپەیمانیی “میللەت”، کەمال کڵچدارئۆغڵو لە ھەڵبژاردنەکاندا کێبڕکێی دەکەن بۆ بەدەستهێنانی پۆستی سەرۆککۆمار.

بەپێی ئەنجامی کۆتایی دامەزراوەی باڵای ھەڵبژاردنەکان لە تورکیا لە  خولی یەکەمی ھەڵبژادنەکاندا رەجەب تەیب ئەردۆغان، سەرۆککۆماری تورکیا،  سەدا 49.52 و کەمال کڵچدارئۆغڵو سەدا 44.88 دەنگەکانیان بەدەستھێنابوو.

دامەزراوەی باڵای ھەڵبژاردنەکان لە تورکیا دوای راگەیاندنی ئەنجامە کۆتاییەکانی پرۆسەی دەنگدان لە خولی دووەمی ھەڵبژادنەکانی سەرۆکایەتییدا، سەرکۆماری نوێی تورکیا بۆ پێنج ساڵی داهاتوو رادەگەیەنێت.