وەزیری دارایی عێراق مەترسییەکی گەورە لەسەر خەرجکردنی مووچە ڕادەگەیەنێت

SNN-

وەزیری دارایی عێراق ئاشکرای دەکات، بوونی کورتهێنانی ڕاستەقینەی دارایی بووەتە بەربەستێکی سەرەکی لە بەردەم تەواوکردنی پرۆسەی خەرجکردنی مووچەی فەرمانبەران، خانەنشینان و سوودمەندانی چاودێریی کۆمەڵایەتی.

فالح ساری، وەزیری دارایی عێراق ڕایگەیاند، کۆی ئەو بڕە پارەیەی مانگانە بۆ دابەشکردنی مووچە پێویستە دەگاتە 7 تریلیۆن و 800 ملیار دینار.

لە دانیشتنێکدا لەگەڵ حەیدەر موتەیری، پەرلەمانتاری کوتلەی “ئیشراقەت کانون”، وەزیری دارایی  رایگەیاندوە کە وەزارەتەکەی لە ڕۆژانی ڕابردوودا بڕی 3 تریلیۆن دیناری بۆ چەند وەزارەتێک خەرج کردووە.

فالح ساری جەختیشییکردووەتەوە، لە ئێستادا تەنها 1.5 تریلیۆن دینار نەختینە (سیولە) بەردەستە و کار دەکرێت بۆ ئەوەی بڕەکەی زیاد بکرێت بۆ 1 تریلیۆن و 650 ملیار دینار، تاوەکو بتوانرێت مووچەی خانەنشینانی پێ دابەش بکەن.

وەزیری دارایی ئاماژەی بەوەشکردووە، وەزارەتەکەیان لە سایەی کورتهێنانی 3 تریلیۆن و 300 ملیار دیناردا، بەردەوام دەبێت لە هەوڵەکانی تاوەکو سەرچاوەی دارایی بۆ وەزارەتەکانی دیکەش دابین بکات.