کەشناسیی عێراق: شەپۆلێکی گەرمای بەتین وڵات دەگرێتەوە و پلەکانی گەرما 50 پلە تێدەپەڕێنن

SNN –

دەستەی کەشناسیی عێراق پێشبینییەکانی کەشوهەوای ڕۆژانی داهاتووی بڵاوکردەوە و هۆشیاریدا لە ڕووبەڕووبوونەوەی شەپۆلێکی گەرمای بەتین کە ڕوو لە سەرانسەری وڵات دەکات و لە پێنج پارێزگاش پلەکانی گەرما 50 پلەی سیلیزی تۆمار دەکەن.

بەپێی ڕاگەیەندراوی دەستەکە، لە ڕۆژی شەممەوە پلەکانی گەرما بەراورد بە ڕۆژانی پێشوو بەڕێژەیەکی بەرچاو بەرزدەبنەوە. لە پارێزگاکانی (نەجەف، موسەننا، میسان، زیقار و بەسڕە) ئەوپەڕی گەرما تۆمار دەکرێت و پلەکانی گەرما دەگەنە 50 پلەی سیلیزی یان زیاتر.

کەشناسیی عێراق ئاماژەی بەوەش کردووە، لە پارێزگاکانی دیکەش پلەکانی گەرما بەم شێوەیە دەبن:

• سلێمانی و دهۆک: 43 پلە

• هەولێر: 44 پلە

• نەینەوا و ئەنبار: 47 پلە

• دیالە: 48 پلە

• بەغدا، کەرکووک، بابل، سەلاحەدین، واست، کەربەلا و دیوانییە: 49 پلە

لە بەشێکی دیکەی ڕاگەیەندراوەکەدا هاتوووە، پێشبینی دەکرێت لە ڕۆژانی هەفتەی داهاتوودا، بە تایبەتی لە ڕۆژی سێشەممەوە، بەرزبوونەوەی پلەکانی گەرما لە سەرانسەری عێراقدا زیاتر بەردەوام بێت.