وەزارەتی کارەبا: دەست بە جێبەجێکردنی داشکاندنی قەرزی کەڵەکەبوو دەکرێت

SNN-

ئەمڕۆ دووشەممە، پڕۆسەی داشکاندنی قەرزی کەڵەکەبووی هاوبەشانی کارەبا لە ڕێگەی سیستمی (ئی-پسوولە)ـەوە دەستی پێکرد، و بڕیارەکەش بۆ ماوەیەکی دیاریکراو و بە ڕێژەی جیاواز جێبەجێ دەکرێت.

بەپێی ڕاگەیەندراوی وەزارەتی کارەبا،داشکاندنەکە لە 3ی ئاب تا 10ی ئەیلوول بەردەوام دەبێت و وەک دوایین هەل بۆ قەرزی کۆنی پێش پرۆژەی ڕووناکی دادەنرێت، کە تێیدا هاوبەشانی پڕۆژەی ڕووناکی و دەرەوەی ڕووناکی دەتوانن بەم ڕێژانە سوودمەند بن:

50٪ داشکاندن بۆ هەموو هاوبەشانی ماڵان و کشتوکاڵی.

25٪ داشکاندن بۆ هەموو هاوبەشانی پیشەسازی، بازرگانی و میری (جگە لەو هاوبەشانەی فیدەری تایبەت بەخۆیان هەیە).

وەزارەتی کارەبا جەختی لەوە کردوەتەوە کە پارەدان تەنها لە ڕێی (ئی-پسوولە)ـەوە دەبێت و ئەم دەرفەتە تەنیا بۆ یەک جارە و دواتر نوێ ناکرێتەوە، هەروەها دوای تەواوبوونی ماوەی دیاریکراو، بڕینی کارەبا لەسەر نەدانەوەی قەرزی کەڵەکەبوو دەستپێدەکات.