چەکی ئەتۆمیمان ناوێت و دەبێت ئەمریکا بڕیار لەسەر راگرتنی جەنگ بدات

SNN

مەسعوود پزیشکیان، سەرۆککۆماری ئێران لە گفتووگۆیەکی تایبەتدا لەگەڵ کەناڵی (فۆکس نیوز)ـی ئەمریکی رایگەیاند کە وڵاتەکەی بە هیچ شێوەیەک بەدوای بەدەستهێنانی چەکی ئەتۆمیدا ناگەڕێت و ئامادەیە پرۆگرامەکەی بخاتە ژێر پشکنینی نێودەوڵەتی؛ هاوکات جەختی کردەوە کە تاران نایەوێت شەڕ بەردەوام بێت و ئەوە واشنتنە کە دەبێت بڕیار لەسەر کۆتاییهێنان بە جەنگ بدات.

لای خۆیەوە پزیشکیان رەتیکردەوە کە ئێران بەدوای چەکی ئەتۆمیدا بێت و گوتی، “رێبەری باڵای شەهیدمان پێشتر چەندین جار رایگەیاندبوو کە بەپێی فەتوای ئایینی، چەکی کۆمەڵکوژ حەرامە و نایاساییە.”

پزیشکیان ئامادەیی تارانی دەربڕی بۆ کەمکردنەوەی رێژەی پیتاندنی یۆرانیۆم بە مەبەستی رەواندنەوەی نیگەرانییەکان و گوتیشی، “ئێمە گوتوومانە ئامادەین پیتاندنی یۆرانیۆم کەم بکەینەوە؛ ئەمە گرفتێکی ئەوتۆ نییە و ئامادەین خۆمان بخەینە ژێر چاودێری و پشکنینی نێودەوڵەتییەوە.”