قاسم ئەعرەجی: کۆتاییهاتنی ئەرکی هاوپەیمانیی نێودەوڵەتی بە مانای کۆتاییهاتنی هاوبەشیی ئەمریکا نییە

SNN-

 قاسم ئەعرەجی،ڕاوێژکاری ئاسایشی نەتەوەیی عێراق رایگەیاند کە کۆتاییهاتنی ئەرکی هاوپەیمانیی نێودەوڵەتیی دژ بە داعش بە سەرۆکایەتیی ئەمریکا لە عێراق، بە مانای کۆتاییهاتنی هاوبەشی لەگەڵ ئەو وڵاتە نییە، بەڵکو گۆڕانکارییە بۆ هاوکاریی ئەمنی و هەواڵگریی دووقۆڵی.

ئەمڕۆ چوارشەممە، ئەعرەجی لە پۆستێکدا لە تۆڕی کۆمەڵایەتیی ئێکس ئاماژەی بەوە دا کە وڵاتەکە دەگاتە وێستگەیەکی گرنگ بە کۆتاییهێنان بە بوونی سەربازیی هێزەکانی هاوپەیمانان و گواستنەوە بۆ پەیوەندیی دووقۆڵی، کە ئەمەش سەروەری جێگیر دەکات و خزمەتی بەرژەوەندییە نیشتمانییەکان دەکات.

هەروەها دووپاتی کردەوە کە سەرکەوتن بەسەر داعش بە قوربانیدانی عێراقییەکان و ئازایەتیی هێزە چەکدارەکان بەدیهاتووە، هاوکات رۆڵی پشتیوانیی هاوپەیمانیی نێودەوڵەتی و وڵاتانی دۆست بەرز نرخاند.

ئاماژەی بەوەش کرد کە پەیوەندییە نوێیەکان لەسەر بنەمای رێزگرتنی یەکتر، ئاڵوگۆڕی زانیاری و بەهێزکردنی ئاسایش و سەقامگیری بەردەوام دەبن.